AKTIVITETEPËR MEDIAT

Kreu i KLP-së prezanton drejtuesin e ri të Prokurorisë Elbasan, Kreshnik Ajazi

Gent Ibrahimi: Prokurorët të mësohen me pavarësinë në ushtrimin e detyrës
Kryetari i KLP-së, Gent Ibrahimi, prezantoi sot drejtuesin e Prokurorisë Elbasan, Kreshnik Ajazi, në një takim ku ishin të pranishëm zv/drejtuesi i prokurorisë, kryetarja e Gjykatës Elbasan, drejtuesi i Policisë së qarkut Elbasan, prokurorët dhe administrata e zyrës së Prokurorisë Elbasan.
Në fjalën e tij, Ibrahimi pasi i uroi suksese Ajazit në detyrë, theksoi se sistemi i prokurorisë ka nevojë për lidership, i cili qëndron te forca morale dhe profesionale e drejtuesit.
“Drejtuesi i prokurorisë ka një rol të rëndësishëm në mbarëvajtjen dhe eficiencën e punës në prokurori. Deri tani kemi arritur të emërojmë 5 drejtues prokurorish dhe mendoj se kemi bërë zgjedhje të mira. Elbasani është një prokurori e cila kërkohet nga prokurorët, KLP nuk ka vështirësi të plotësojë vakancat nëse do të ketë të tilla. Mënyra si ne garantojmë karrierën e prokurorëve është thelbësore për eficiencën e sistemit. Prokurorët duhet të mësohen me pavarësinë e tyre në ushtrimin e detyrës. KLP po punon për t’ju garantuar juve autoritetin dhe sigurinë për të kryer detyrën”, tha ai.
Nga ana e tij, Kreshnik Ajazi u shpreh krenar që është zgjedhur nga një institucion që mishëron nevojën e reformimit të drejtësisë.
“Gjatë 2020, kemi trajtuar një numër të madh çështjesh dhe kemi rezultate të prekshme në goditjen e strukturave kriminale në bashkëpunim me strukturat e policisë. Rezultatet janë të prokurorëve, jo të miat. Elbasani ka problematikat e veta, jemi angazhuar me gjithë kapacitetet në hetimin sa më me përgjegjshmëri të çështjeve sensitive për opinionin publik. Jemi të angazhuar të kemi rezultate konkrete në hetimin e korrupsionit dhe krimit të organizuar. Kemi nevojë për investime në sigurinë fizike të institucionit, përcaktimin e statusit të nëpunësve civile në prokurori dhe i kemi kërkuar Prokurorit të Përgjithshëm zgjidhjen e këtyre problemeve. Në prokurorinë e Elbasanit nuk ka asnjë zëvendësim prokurori gjatë 2020 pa shkak ligjor”, tha Ajazi.