Këshilli i Lartë i Prokurorisë zhvilloi ditën e enjte seancë plenare në prezencë të anëtarëve dhe përfaqësuesve të ftuar nga Ministria e Drejtësisë. Ndërkohë, përfaqësues të medias dhe programit EU4JUSTICE ndoqën seancën online përmes platformës Zoom.
Mbledhja nisi me shpalljen e vendimit lidhur me procedimin disiplinor nr. 2292/6 datë 13.12.2024, të ardhur nga Inspektori i Lartë i Drejtësisë ndaj magjistratit Kledian Llaho, prokuror në Prokurorinë pranë Gjykatës së Shkallës së Parë të Juridiksionit të Përgjithshëm Sarandë. Të pranishëm në sallë ishin dy përfaqësues të ILD-së ndërsa z. Llaho nuk mori pjesë.
Në seancën e sotme, Këshilli miratoi kërkesën e ILD-së për procedim disiplinor ndaj magjistratit Llaho, duke vendosur me shumicë votash masën “Vërejtje publike”. Më herët, ILD kërkoi nga Këshilli pranimin e kërkesës për procedim disiplinor dhe propozoi masën “Shkelje e rëndë”, me ulje pagese 40% për një vit.
Pas shqyrtimit të relacioneve të përgatitura nga Komisioni i Zhvillimit të Karrierës, Këshilli vendosi unanimisht caktimin e përkohshëm të tre (3) prokurorëve në pozicionin e drejtuesve si më poshtë:

1. Erjon Shqarri si drejtues në Prokurorinë pranë Gjykatës së Shkallës së Parë të Juridiksionit të Përgjithshëm, Vlorë.
2. Erjon Shehaj si drejtues në Prokurorinë pranë Gjykatës së Shkallës së Parë të Juridiksionit të Përgjithshëm, Lezhë.
3. Suela Beluli si drejtuese në Prokurorinë pranë Gjykatës së Shkallës së Parë të Juridiksionit të Përgjithshëm, Durrës.
   Në përfundim, Këshilli miratoi kualifikimin e kandidatëve Suela Beluli dhe Edmond Kaloshi për pozicionin e drejtuesit të Prokurorisë pranë Gjykatës së Shkallës së Parë Durrës, përmes procedurës së ngritjes në detyrë. Pas shortit për zgjedhjen e relatorëve që do të kryejnë procedurën e verifikimit, u caktuan z. Erind Mërkuri për Suela Belulin dhe z. Olger Eminaj për Edmond Kaloshin.